गरि खान पाउने नेपालका लागि अर्जी पत्र

नयाँ नेपाल भन्नाले सधैं बन्द हड्ताल, अराजक गतिविधि, हत्या हिंसा र अन्योलको भुमरीमा परेको नेपाल जस्तै भईसक्यो । के यस्तो नेपालका हामी सचेत नागरिकलाई यो लज्जास्पद अवस्था हैन ? के तपाईलाई स्विकार्य छ यस्तो नेपाल ? हरेक दिन सयौंको संख्यामा लाचार र विवश भएका कैयौं नेपाली नेपाल छाडी अन्यत्र विस्थापित हुन बाध्य छन् । के हामीले संघर्ष गरी परिवर्तन गरेको नयाँ नेपाल यहि हो त ? कहिले सम्म यस्तो अवस्था सहेर बस्ने हामी ? कहिले सम्म मुक दर्शक भएर बस्ने हामी ?

अबको नेपाल भनेको सबैले गरी खान पाउने नेपाल हुनुपर्छः हत्या, हिंसा, बन्द र चन्दा आतंकबाट मुक्त हुनुपर्छ । हामीले आन्दोलनमा सहभागी भई बनाएको नयाँ नेपाल भनेको सबै नेपालीले सम्मानजनक र सुरक्षित भई गरी खान पाउने नेपाल हो । यो नेपालमा सबैका लागि ठाउँ छ । सबै जाति, धर्म, संस्कृति र राजनीतिक आस्था राख्ने नेपाली यहाँ अटाउँछन् र मिलेर बस्न सक्छन् । हामीलाई हरेक नेपालीको मनमा रहेको नेपालीपनमा विश्वास छ । त्यसैले आम नेपाली फेरि एक पल्ट उठ्ने बेला आएको छ । आउनुहोस् सबैले गरी खान पाउने नेपालको सृजनामा हातेमालो गरौं ।

हामीले देखेको सुन्दर नेपाल बनाउनका लागि हाम्रो आवहानः

• जबरजस्तीका बन्द तथा चन्दा आतंक जस्ता अराजक गतिविधिलाई आपराधिक घटनाको रुपमा लिई दोषी माथि कारवाही चलाउनु पर्छ । यो एक सार्वजनिक मुद्दा हो । किन भने यस्ता बन्दले सर्वसाधारणको स्वतन्त्र रुपमा हिडडुल गर्न पाउने अधिकार हनन गरेको हुन्छ । विरोध जनाउने धेरै तरिका हुन्छन् तर बन्द गर्दा अर्काको अधिकार समेत हनन् हुने हुनाले यस्ता क्रियाकलाप रोक्नका लागि सुरक्षा निकायले सक्रिय भएर कदम चाल्न आवश्यक छ । बन्द हुने कारण धेरै जसो गुनासाहरुको सही सुनवाई नभएर पनि हो । त्यसैले न्यायालय र सुरक्षा निकायहरुलाई चुस्त बनाउने तर्फ सबैको पहल हुनुपर्छ । यसै गरी राजनीतिक मुद्दाको आडमा हिंस्रक गतिविधिलाई प्रोत्साहन दिने प्रवृतिको अन्त्य गर्न सबै राजनीतिक दल तथा समुहले सार्वजनिक रुपमा प्रतिबद्धता जाहेर गर्नुपर्छ र त्यसको कार्यन्वयनका लागि आम जनता र सुरक्षा बल दुबैले सजग र सक्रिय रहनुपर्छ ।
  
  
• राज्यमा अराजक गतिविधि र हत्या हिंसा नियन्त्रण गर्न विधिको शासन स्थापना गर्नु पर्छ । यसका लागि विधीको सर्वोच्चता कायम गर्नु आवश्यक छ । पहुँच हुनेहरुलाई कानून नलाग्ने प्रवृतिको अन्त्य गर्नु पर्छ । कानूनले सबैलाई समान रुपमा व्यवहार गर्नुपर्छ र विधिको सर्वोच्चतालाई सबैले स्विकार्नु पर्दछ । जनताकै मत जितेर आएकै भए पनि कानून सबैलाई उत्तिकै र समान कानून लागु हुनुपर्छ । शान्ति सुव्यवस्था कायम गर्नका लागि न्यायालयमा रहेको राजनीतिकरण हटाई सुरक्षा निकायहरुलाई पनि सुदृढ गर्दै लैजानुपर्छ । एक आम नेपालीले नेपालमा बस्न र गरी खानका लागि सुरक्षित महसुस गर्ने अवस्थाको सृजना गर्ने जिम्मेवारी राज्यको हो । यसबाट थरिथरिका बाहाना गरी राज्य र सरकारी निकायहरु पन्छिन पाउँदैनन् ।
  
  
• कुनै पनि नेपालीले कानूनको दायरा भित्र रही आर्जेको सम्पत्तित्को सुरक्षा हुनुपर्छ । सम्पत्ति जायज हो वा होइन भन्ने कुरा शंका लागेमा न्यायालयले छिनोफानो गर्ने विषय हो । यसमा अरु कुनै समुहले नागरिकको नाममा या अरु कुनै नाममा पनि हस्तक्षेप गरेमा त्यो आपराधिक कार्य हो र यस्तो कार्यलाई दण्डित गर्नुपर्छ । नेपालीले नेपालमा गरी खान पाउनका लागि जीउ र धन दुवैको सुरक्षा हुनु आवश्यक छ । यदि जीउ र धनको सुरक्षा नै गर्न नसक्ने हो भने हामी के का आधारमा नेपालीलाई बाहिर जान खोज्दा रोक लगाउनु पर्छ भनी ठूला ठूला भाषण दिदै हिड्छौं ? यहिँ पसिना बगाउने नेपालीको कदर गर्नका लागि पनि कमाएको धनको सुरक्षा दिनुपर्छ । काम गर्छु भन्दा अवसरहरुमा विभिन्न कारण देखाई रोक लगाउने कानून बनाउने र अनावश्यक प्रशासनिक अनुमति लिनु पर्ने झन्झटिलो प्रवृत्तिको अन्त्य गर्नु पर्छ । यसका लागि लगानी र आर्थिक क्षेत्रमा प्रशासनिक हस्तक्षेप र कानूनी हस्तक्षेपलाई नियन्त्रण गर्नु पर्छ । यसैले गरी खानका लागि हामीलाई चाहिन्छ आर्थिक स्वतन्त्रता, जुन संविधानबाटै सुनिश्चित हुनुपर्छ ।

यदि यी तीन मध्ये कुनै पनि एक कुरामा तपाईको सहमती छ भने आउनुहोस् हामी हातेमालो गरौं । अब कति सहने ? हामीले सोचे जस्तै नयाँ नेपाल रचना गर्ने हो भने आजै देखि सम्बन्धित निकायलाई झकझक्याउँ । यो हाम्रो सपनालाई खेर जान नदिउँ । यसका लागि तपाइको सक्रिय सहभागिता अत्यावश्यक छ । तपाइँको सहमती जनाउन तल दिइएको फाराम भर्नुहोस् र आफ्नो समर्थन जनाउनुहोस् ।

अबको नेपाल, गरी खान पाउने नेपाल तर्फ तपाइँको पहिलो पाइला ।